Cearcall a' Chuain: sgrìobh balaich Runrig an t-òran a chòrdas ris na mìltean, agus is cinnteach gu bheil mòran fhathast a' dèanamh oidhirp air a dhol thairis a'chuain chun nan eilean agus air Gàidhlig ionnsachadh air a shàilleabh. A-nis tha cearcaill eile air nochdadh far am faod luchd turais tadhal air eileanan 's far am faod iad Gàidhlig a chluinntinn agus a chleachdadh.
Thòisich deasbad mu chearcall Gàidhlig aig a' Mhòd san Òban ann an 2003 oir bha teachdairean á Èirinn a' dèanamh luaidh air cho soirbheachail 's a tha an leithid de rud air a bhith dhaibhsan. Tha an "Ring of Kerry", a tha ceud mìle ann am faid, a' tà
ladh nam mìltean de luchd turais ás gach ceàrn.Tha slighe agus àiteachan fuirich a dh'fhaodas iad a chleachdadh air a dhealbhadh dhaibh.
Chaidh a' chiad chearcall ann an Alba ainmeachadh san Iuchar an-uiridh. Tha e stèidhichte air an t-slighe-chuain aig Mac a' Bhriuthainn ris an can iad Hopscotch. Tha e a' toirt a-steach an t-Òban, Barraigh, Èirisgeigh, Uibhist a-Deas, Beinn na Fadhla, Uibhist a-Tuath, an t-Eilean Sgitheanach agus Malaig. An dèidh dha a dhol air an t-slighe, sgrìobh Aonghas Pàdraig Caimbeul leabhraichean iùil air a bheil fèill mhòr, agus ghabh na mìltean ùidh sa chuairt. Leis cho soirbheachail 's a tha i air a bhith, chuireadh còig cuairtean eile air bhog air an aiseag eadar an t-Òban agus Muile bho chionn ghoirid agus chuir suas ri 300 gnìomhachasan an taic riutha. 'Nam measg tha Bòrd na Gàidhlig, Comhairle nan Eilean Siar, Comhairle Earra-Ghaidheal agus Bhòid, taighean òsta 's àiteachan fuirich.
Is iad na turasan: An t-Òban, Muile, Àird nam Murchan, An t-Eilean Sgitheanach; An Gearastan, Malaig, an t-Eilean Sgitheanach, Uibhist a-Tuath, Beàrnaraigh, Na Hearadh, Leòdhas, Ulapul; Colbhasa, An t-Òban; An t-Òban, Cola, Tiriodh; Malaig, Eilean nam Muc, Rum, Eige agus Canaigh. Thuirt Jim Mather, Ministear na Turasachd ann an Dùn Eideann, "Thug a' chiad Chearcall Gàidhlig brosnachadh do thurasachd agus do chultar na sgìre. Tha mise cinnteach gun cuir na cearcaill eile seo gu mòr ri soirbheachadh air feadh nan eilean, agus cuideachd gum bi mòran deònach Gàidhlig ionnsachadh."
Tha Philip Riddle, stiùiriche VisitScotland, ag aontachadh, 's tha e den bharail gum buannaich turasachd agus cultar on iomairt.
The full article contains 436 words and appears in The Scotsman newspaper.
